«Заритал» паркындагы янгында зыян күргән гражданнар белән эшләү буенча оператив штабның эше дәвам итә.
Хәзерге вакытта эшкуарлык эшчәнлеген торгызу өчен 36 ай срокка еллык 1% белән 8 заем бирелде.
Шулай ук дүрт эшкуарга заемнар бирү хупланды. Сәүдә-сәнәгать палатасында документлар кабул итү һәм консультацияләр бирү эше дәвам итә.
Эшкуар Сергей Сурич 5 миллион сум алу өчен документларны рәсмиләштерүе турында сөйләде: "Документларны тиз рәсмиләштердек, без монда икенче тапкыр. "Гараж 500"дә запчастьләр, автомобиль келәмнәре сата идек. Алынган акчалар бурычларны каплауга, товар алуга китәчәк. Оптимизм бар".
Гарант Наталия Анатольевна күрсәтелгән консультация һәм оештыру ярдәме өчен рәхмәтен җиткерде: "Барысы да тиз рәсмиләштерелде, шәһәр мэры Наил Гәмбәр улы Мәһдиевкә рәхмәтлебез. Гадәттән тыш хәлдән соң фондның булуы турында белдек. Фонд бизнесны торгызу өчен зур ярдәм күрсәтте. Барысы да яхшы булыр дип өметләнәбез".
Бүген Сәүдә-сәнәгать палатасына оператив штабка килгән Чаллылылар Башкарма комитет вәкилләренең тиз реакциясе өчен рәхмәт белдерделәр. Техник-технолог, арендатор Нина Барабанова 10 елдан артык уенчыклар сату белән шөгыльләнүе турында уртаклашты: "Безнең белән эшләгәне өчен Раиса Солтановага зур рәхмәт: барыбызны да чакырды, булышты, ярдәм итте, юнәлеш бирде, барлык янгыннан зыян күрүчеләр исеменнән аңа зур рәхмәт, - диде ул. - Мэр Наил Гәмбәр улы Мәһдиев белән очрашуга без диярлек барыбыз да килдек, шуны әйтәсем килә: безнең барлык сорауларыбызны тыңладылар, һәр яктан ярдәм иттеләр. Хәзер мин кредит алуга гариза тутырам".
Татарстан Республикасы Икътисад министрлыгына караган Татарстан Республикасы Гарантия фонды директоры урынбасары Расим Усманов: "Татарстан Республикасы Премьер-министры урынбасары – Татарстан Республикасы Икътисад министры Мидхәт Рәфкать улы Шаһиәхмәтов кушуы буенча зыян күргән эшкуарларга һәм үз-үзен эш белән тәэмин итүчеләргә республиканың беренче чираттагы ярдәм чаралары булдырылды. Без зыян күргән эшкуарлар белән консультация очрашулары үткәрәбез һәм Татарстан Республикасы Гарантия фонды гарантиясе астында Татарстан Республикасы Эшкуарлыкка ярдәм итү фондыннан 70% күләмендә һәм 0,1% минималь комиссия ставкасы белән ташламалы заем алуга гаризаларны рәсмиләштерүдә ярдәм күрсәтәбез", - диде.
«Чаллы шәһәре Сәүдә-сәнәгать палатасы» берлеге генераль директоры Фәрит Башаров шәһәр мэры һәм Башкарма комитет ярдәме белән гражданнарны кабул итүнең югары дәрәҗәдә оештырылуын билгеләп үтте: "Кешеләр билгеләнгән вакытка киләләр, документлар күләме зур, эшкуарлыкка ярдәм итү фонды, салым хезмәте, гарантия фонды хезмәткәрләренең ничек эшләвен күрәм. Янгыннан зыян күргән кешеләрдә нервлылык юк, эш режимында эшлибез. Соңгы эшкуарга кадәр эшлибез. Кешеләргә кирәкле ярдәм күрсәтү өчен барысы да лаеклы оештырылган. Алар бит барысын да югалттылар".