Бүген “Прибрежный” паркы мәйданыннан чираттагы шефлык ярдәме озатылды. Аның составында өч УАЗ юлсыз җирдә йөрүче автомобиль, җылы киемнәр, дарулар, азык-төлек (боткалар, куертылган сөт, тушенка), кәгазь салфеткалар, тезлекләр һәм башка беренчел кирәк-яраклар бар.
Шәһәр Мэры Наил Мәһдиев гуманитар ярдәм җыюда катнашкан барлык битараф булмаган чаллыларга рәхмәтен җиткерде. «Бу катлаулы чорда без сугышчылар һәм аларның гаиләләре белән бергә булырга тиеш. Анда, хезмәт иткән урыннарында, егетләр барысы белән дә тәэмин ителгәннәр – мин безнең сугышчылар белән аралаштым, үзем күрдем. Ләкин артык ярдәм булмый. Җылы киемнәр, өстәмә азык-төлек кирәк. Техника чаллы сугышчылары хезмәт итә торган хәрби частька барып җитәчәк. Ярдәм җыюда катнашкан һәркемгә күрсәткән ярдәмнәре һәм изге күңелләре өчен рәхмәт белдерәм. Эшкуарларга, Башкарма комитетка, үтенечләргә тиз арада җавап бирүчеләрнең барысына да рәхмәтлемен».
Шәһәр башлыгы хәбәр иткәнчә, Чаллыда мобилизацияләнгәннәрнең гаиләләренә ярдәм күрсәтү дәвам итә, шулай ук аны күрсәтүнең яңа мөмкинлекләре табыла. Шулай итеп, гаиләдә бала туган очракта, мобилизацияләнгәннәрнең гаиләләренә бер тапкыр бирелә торган акчалата ярдәм күрсәтү турында карар кабул ителде. Кичә Наил Мәһдиев шәхсән үзе яңа туган чаллылы баланың әнисенә конверт тапшырды, аның әтисе хәзерге вакытта Казандагы танк училищесында уку үтә.