Игълан ителгән ел кысаларындагы чараларга 27 гыйнварда «Энергетик» мәдәният сараенда тантаналы рәвештә старт биреләчәк, дип хәбәр итте шәһәр Башкарма комитеты җитәкчесе урынбасары Рамил Хәлимов Шәһәр Советының XX утырышында.
«Шәһәр төзелеше чорында формалашкан үзара хөрмәткә нигезләнгән милләтара мөнәсәбәтләр безнең өчен аеруча кадерле. Милләтара һәм динара мөнәсәбәтләр мәсьәләсе, милләтара татулык традицияләрен саклау һәм арттыру — безнең эшебезнең төп тормыш принциплары», - дип белдерде Рамил Хәлимов һәм шәһәрдә бу юнәлештә зур эш алып барылуын билгеләп үтте.
Яр Чаллыда 22 милли берләшмә эшли. Алар «Родник» халыклар дуслыгы йортында урнашкан, анда узган ел капиталь ремонт ясалган иде. Шунда ук милли мәдәниятләрне яратучылар клублары да эшли, алар шәһәрдә 10 исәпләнә. Моннан тыш, милли бәйрәмнәр үткәрелә. Алар арасында «Нәүрүз», Иван Купала һәм башкалар бар. Шәһәрдә якташлар очрашулары кичәләре оештырыла. Татарстан Республикасы районнарының 35 якташлыгы беренче төзүчеләрнең данлы традицияләрен дәвам итә. Дәүләт һәм дин мөнәсәбәтләрен нәтиҗәле коруга зур игътибар бирелә.
«Без бердәм шәһәр җәмгыятендә яшибез, эшлибез, тырышабыз, иҗат итәбез, - дип шәрехләде шәһәр мэры Наил Мәһдиев. - Һәм бу мөнәсәбәтләрне төзергә һәм сакларга кирәк. Игълан ителгән Ел кысаларында чаралар бар, без аларда катнашачакбыз. Безнең бурычыбыз - депутатлар һәм иҗтимагый берләшмәләрнең бурычы - милләтара, динара тынычлыкны һәм татулыкны ныгытуга юнәлтелгән эш алып бару».