Россия Федерациясе Дәүләт Думасы депутаты, Дәүләт Думасының кече һәм урта эшкуарлык комитеты рәисе беренче урынбасары Альфия Когогина кран-манипуляторлар белән махсус техника җитештерүче предприятиенең җитештерү мәйданчыгында булды.
«Төбәк атналыгы кысаларында мин һәрвакыт икътисадның реаль секторы вәкилләре һәм эшкуарлар белән очрашам. Без хәзерге вәзгыятьне, кече һәм урта бизнес сегментында килеп туган мәсьәләләрне һәм эшкуарлар күзлегеннән дәүләт ярдәменең иң нәтиҗәле чараларын фикер алышабыз.
Бүген җитештерү мәйданчыгында «Коммерческие грузовики» төркеме җитәкчелеге белән очраштым. Тышкы санкцияләр басымы шартларында предприятие исән кала алды. Җитештерүчәнлек һәм керемнәрнең сизелерлек үсешенә ирешелде, предприятиедә уртача хезмәт хакы 120 мең сумга җитте. Бу, шул исәптән, дәүләт тарафыннан гамәлгә ашырыла торган бизнесны яклауның антикризис чаралары һәм «Хезмәт җитештерүчәнлеге һәм мәшгульлеккә ярдәм итү» илкүләм проектында катнашу нәтиҗәсендә мөмкин булды. Оешма «Үстерү» программасын уңышлы гамәлгә ашыра һәм 5s системасын – ябык (арык) җитештерүне кертә. Бюджет акчалары исәбенә тиешле процессларны төзергә мөмкин булды. Предприятие шулай ук күзәтчелек каникуллары, ташламалы кредитлар һәм кече һәм урта эшкуарлык өчен иҗтимагый иминият кертемнәренең киметелгән ставкасы кебек ярдәм чараларын бик уңай бәяли һәм аларны озайтуны тәкъдим итә. Әйткәндәй, күзәтчелек каникуллары 2023 ел ахырына кадәр озайтылды, ә ике тапкыр киметелгән иҗтимагый иминият кертемнәре ставкасы законлы рәвештә гомерлеккә дип беркетелде.
«Минем өчен парламентта да, «Эшкуарлык» федераль проекты кысаларында да алга таба эшләү өчен кече бизнесны дәүләт ярдәме чараларын гамәлгә ашыру буенча даими кире элемтә алу бик мөһим», – дип билгеләп үтте депутат.
«Коммерческие грузовики» ГК ҖЧҖ Россия товарлары һәм хезмәтләренең көндәшлеккә сәләтлелеген арттыруга юнәлтелгән, Россиянең һәр төбәгендәге оешма хезмәткәрләре арасында югары җитештерүчәнлек һәм нәтиҗәлелек мәдәниятен булдыручы «Хезмәт җитештерүчәнлеге» илкүләм проектында катнашучы 54 Чаллы предприятиесе исәбенә керә.